Алматы қаласында болған адам өлімімен аяқталған жол-көлік оқиғасына байланысты дау жаңа бағытқа бұрылды. Аталған іс бойынша полицейдің қатысы болуы мүмкін екенін мәлімдеген заңгер Молдахан Әділетхан қамауға алынды.
Заңгердің ұсталғаны туралы ақпаратты оның көмекшілері хабарлады. Олардың айтуынша, Әділетхан ұсталғаннан кейін оның артынан бес адвокат барған. Алайда әріптестері заңгермен кездесу мүмкін болмай отырғанын, бұл процестің түрлі кедергілерге тап болғанын жеткізді.
Өз кезегінде полиция өкілдері заңгерге қатысты тергеу басталғанын растады. Ресми мәліметке сәйкес, ол “әдейі жалған ақпарат таратты” деген күдікпен уақытша ұстау изоляторына қамалған. Дегенмен, нақты қандай ақпараттың жалған деп танылғаны әзірге ашық айтылған жоқ.
Еске сала кетейік, бұған дейін Молдахан Әділетхан Әл-Фараби даңғылы бойында болған жол апатына қатысты мәлімдеме жасаған еді. Аталған апат салдарынан үш адам қаза тапқан. Заңгер өз сөзінде бұл қайғылы оқиғаға лауазымды полиция қызметкерінің қатысы болуы мүмкін екенін алға тартқан.
Қазіргі таңда қоғамда бұл іс бойынша түрлі пікірлер туындап отыр. Бір тарап заңгердің қамауға алынуын сөз бостандығына қысым деп бағаласа, енді бірі құқық қорғау органдарының әрекетін заң аясында жүргізіліп жатқан шара ретінде қарастыруда.
Оқиғаның мән-жайы мен тергеу барысы алдағы уақытта белгілі болмақ.